Agartala, Oct 31: Tripura a•doko bil jakkale sorkariko chalaienga ine Robibar salo, Trinamool Congress (TMC)-ni general secretary Abhishek Banerjee, Biplab Deb-chi chalaienggipa BJP sorkariko matnangataha.

Agartala-o TMC-ni jinma tom•bimonganiko ong•atanio Banerjee, jinmana aganprakangengon, 2018 bilsini election-na campaign ka•anio manderangna ku•mikchetgipa kamrangko chu•sokatchipjaenga ine Biplab Deb-ni sorkariko matnangataha.BJP dolni sorkariko chalaina changjaengani a•sel Tripura a•doko mamingni gitan namroro silroroani dongjaenga ine matnangatengon, BJP-ni kosako uamang dakgrike chegipa ong•gen ine TMC-ni general secretaey parakataha.

“Chinga Tripura-o BJP-ko bon•atgen aro Bengal-oba apsan daken ong•gen. BJP jo•ongnade sam mingsasan dongaia aro uan Mamata Banerjee ong•a. Tripura a•dokni manderang iana tika ponggniko on•na nangenga. Skanggipa civic polls-o aro gnigipa 2023 bilsini Assembly election-o,” ine Banerjee aganaha.

Bangladesh a•songo Hindu-rangko chadrapanina Tripura a•dokoba Muslim-rangni olakkiram nokrangko chadrapskaani giminba ua raken jegalataha.

Mikkang jao Tripura a•doko ong•atna sienggipa civic election-ni pilak biaprangon TMC susagen ineba ua parakataha.

Indake ong•engon, West Bengal-ni gitcham minister Rajib Banerjee aro Tripura-ni BJP MLA Ashis Das-ba TMC-o napaha ine kobor on•aha.