Shillong, Jan 3: India a•songoba COVID-19-ni gital Omicron rokom giprorona a•bachengengahaon, bilsi 15-oni bilsi 18 ong•gipa chadamberangkoba ia kenbegnigipa sabisioniko chel•chakna gita Sombar sal dipet tikarangko su•na a•bachengataha.
Bilsi 15-oni bilsi 18 ong•gipa chadamberangkoba ia COVID-ni tikarangko su•na gita re•anggipa December jao Krismasni salon a•songni Prime Minister Narendra Modi, jinmana parakatahachim. Bilsi 15-oni bilsi 18 ong•gipa chadamberangko January 3 tarik dipet tikarangko su•na a•bachengatahaon ja•delgimin aro bilgrigipa manderangnade tikani gittamgipa pongko January 10 tarik dipet a•bachengskagnok ineba u•iataniko on•angaha.
Union Health Ministry-oni u•iatani gitade, bilsi 15-oni bilsi 18 ong•gipa chadamberangko tika su•anio 2007 bilsini January 1 tarikna skang atchigipa chadamberang tikako su•e ra•na man•gen.
Bilsi 15 batgimin chadamberangko Bharat Biotech-ni tarigipa ‘Covaxin’ tikako su•anggen aro ia Covaxin tikarangko pilak a•dokrangonan watatgen ineba Health Ministry u•iataha.
Meghalaya a•doko bilsi 15-oni bilsi 18 ong•gipa chadamberangna tika su•aniko Meghalaya a•dokni Deputy Chief Minister Prestone Tynsong, Rynjah PHC-o a•bachengate on•angaha aro tikako Deputy CM-ni demechik aro gitcham MLA Jemino Mawthoh-ni demechik, su•e ra•chengaha.
Bilsi 15 batgimin chadamberangna tika su•aniko a•bachengate on•anganio a•dokni Deputy CM, jinmana aganprakangengon, bilsi 15-oni bilsi 18 ong•gipa chadamberang skul aro college-rango ong•na nangani gimin Covid-ni tikarangko su•e ra•na nangchongmota aro da•alo bilsi 15-oni bilsi 18 ong•gipa chadamberangna tika su•aniko a•bachengatna man•ahani gimin namen kusi ong•a ine parakangaha.
