Tura, Aug 25: Bilsi 37-na skangan Tura-o Meghalaya Chamber of Commerce (MCC)-ko bikote, bading chiwalenggipa manderangni namgnina kamrangko ka•engon da•o ia dolni bimingo adita sak bading chiwalgipa manderang, dokkan dakenggipa manderangoniko tangka gildrae ra•enba, cha•ani bostu aro nok rikani bosturangko dam bariataha ine Tura Police-ni am•sandianio ma•sina gita man•aha.

Tura-o ia Meghalaya Chamber of Commerce dolko 1985 bilsion bikote, ia apsan bilsion Society Act-ni ning•o register ka•enba, Tura-o bosturangko bading chiwalenggipa aro bree jakkalenggipa manderangni gisepo maming neng•nikani dongjana gita bosturangni damko nirok sandiengachim.

Ia gitcham MCC dolo Obedstone Marak sagi, secretary ong•e kamko ka•angahachim aro Garo Hills-o mingsinggipa contractor aro bading chiwalgipa Loverson Momin-ba ia dolni dilgipa ong•ahachim.

Ia MCC dolni ja•delbatsranggipa membor-rang siangani ja•man dolni gita kamrangko ka•jahaoba ia dolko bon•atsrangade ong•kujaengachim.

Indake ong•engon, ia antini gisepo Tura Police-ni FIR ka•anio parakani gitade, rim•ako man•gipa BJP MDC Bernard Marak-ni dilanichi gital dake bikottaigipa Meghalaya Chamber of Commerce, gitcham dolni letterhead baksana Registration No. SR/MCC-298/85 of 1985-ko jakkale, Tura-o dokkan dakenggipa manderangoniko tangka paisarangko bang•en gile ra•skaaha.

Ia dolni manderang, re•anggipa 2021 bilsini July 11 tarikonin niam gri tangka paisarangko gile ra•na a•bachengaha ineba police-rangni am•sandianio ma•sina man•aha.

“MCC dol skangan dongmanahaoba, uamangni dongimin niamrangko nichenggija 2021 bilsini July 11 tariko Bernard N Marak (Rimpu)-ni dilanichi tom•aniko ong•ataha aro una Wilver Greham M Danggo, Anish M Sangma, Arup Nag, Rajesh Barman, Patcheng T Sangma, Prabin Panthi aro gipinrangba dakchake on•aha,” ine police-rangni am•sandianio parakataha.

Police-rangni FIR-o parakangkuani gitade, ia manderang, dokkan dakenggiparangoniko membership fee aro jaanti renew ka•ani fee ine bimingko donenba bang•bea tangka paisarangko gile ra•ahachim.

Police-rangni sing•sandianirangko dakon, ia dolni office bearer-rang, 2021 July jaoni 2022 bilsini January jaona tangka paisarangko gile ra•ani bidingo maming talatanirangkoba on•na man•jaha, tangka paisarangko gilna gita bil on•gipa lekkarangkoba mesokna man•jaha aro ia tangka paisarangko maini gimin jakkalenga, maming sakkirangko mesokna man•jaha ineba police-rangni report-o parakaha.

Police-rangni report-o parakani gitade, ia gital MCC dolna commission-ko on•skachina gitasa Tura-o ma•manti bosturangni damrangko bariatchina gita bading chiwalgiparangko aro dokkan dakgiparangko ia dolni manderang ge•etahachim aro uandaken bosturangko breenggipa ramram manderangsa neng•nikanirangko chagrongna nangskaahachim.

Tura-o bading chiwale cha•enggipa gipin jatrangkoba ia dolni manderang, rim•ako man•gipa Tura-ni BJP MDC Bernard Marak-onikosa Trading by Non-Tribal (TMT) licence-rangko ra•china ge•etahachim. Niam gitade, GHADC-o TNT licence-rangko Taxation department-san on•na bil dongskaaiachim aro MDC-rangde iako on•na maming bil dongjachim.