Shillong, Dec 15: Bilsi bongana MLA ong•e dangdike on•ani ‘report card’-ko constituency-tangni manderangna mesokgen ine Sukrobar salo, Mylliem constituency-ni MLA Hamletson Dohling parakataha.
Bristibar salo, Mylliem-ni Nongrum-o skul hall gitalko nokdonggae on•angani somoio jinmana aganprakangengon, uni kamrangko manderang nie ra•china gita ua an•tangni report card-ko chapa ka•enba, Mylliem constituency-ni nokantionan sualatgen ine Dohling parakataha.
Dohling-ni parakatani gitade, jekai skulo poraienggipa bi•sarang bilsi bon•o an•tangtangni report card-rangko man•achim, apsan daken uaba da•o an•tangni bilsi bongana MLA ong•e dangdike on•ani report card-ko chapa ka•enba manderangna mesokatgen.
Bilsigninade COVID sajinmani a•sel kamrangko ka•anio champengatako man•ahani gimin ua chu•gimik bilsi bonganade dangdike on•na man•jaha ineba Mylliem MLA parakataha.
Mylliem constituency-ni MLA-na seokako man•chengaoni ua an•tangni constituency-o skulrangko namdapatna gita gong crore 3 lak 80 tangkarangko man•bae on•aha ine janapatengon, Bristibar salo nokdonggagipa Nongumlong LP skulni gital hall-ko rikanioba gong 37,02,028 tangkarangko koros ka•aha ine Dohling parakataha.
2018 bilsini Assembly election-o Hamletson Dohling, PDF doloni susaesa seokako man•ahaoba da•o National People’s Party (NPP)-o napskae 2023 bilsini election-o susana miksongengachim.
