Shillong, Feb 28: Bishnupur-ni Lumjatshai-o dam 40 dokkanrangna rikenggipa ‘Organic Market’-ko South Shillong-ni MLA Sanbor Shullai nieani ja•man, ia market ba bazar-ko bakan matchotgnok ine parakataha.

Ia organic market-ko rikna gita Revenue Department, gong kror 4 tangkarangko chame on•ahachim aro ia market-ko rikna gita MLA an•tangan chanchichengdilahachim.

“Anga an•tangni constituency-o donggipa manderangna skangonin organic market-ko kulie on•na gisiko skani gnangchim aro 2013 bilsini election-o anga cheani ja•man angni jumangko be•en pil•atna gita ia kamko a•bachengatna man•aha. Da•o ia bazar-ko matchotangengaha aro bakan jolo bading chiwale cha•giparangna pakwate on•anggnok,” ine Shullai aganaha.

COVID-19-ni a•sel ia organic market-ko rikani ja•manchakna nangaha ineba MLA talataniko on•angaha.

Ia biapko nitobatatna gita ua ramako tarina a•bachengatgen ineba Shullai parakataha.