Imphal, Feb 28: Manipur Assembly election-ni skanggipa bako pu•onani Sombar attamo matchotangaha aro ia skanggipa bako pu•onani gimik 78.03 percent gapaha.
Ia skanggipa bako, Manipur a•dokni gimik dam 60 constituency-rangoni dam 38 constituency-na pu•onaniko ong•atangaha, jeon sak 15 me•chik candidate-rangko man•chape gimik sak 173 candidate-rang susaengachim.
Election-ko ong•atgipa dambonga a•jarangoni Imphal West aro Kangpokpi-o 82.19 percent ong•e bang•batgipa ong•aha aro uni ja•man Imphal East a•jao 76.64, Churachandpur-o 74.45 aro Bishnupur a•jao 73.44 percent ong•skaaha.
Police official-rangni u•iatani gitade, election-ni somoio Churachandpur a•jao dolgni political dolrang dinggrikanichi mande saksa saknaanirangko man•aha aro apsan daken, Imphal East, Imphal West aro Kangpokpi a•jarangoba dinggrikanirangko kobor man•aha.
Phunal Maring Polling Station-oba badiaba dolni manderang silchidarerangko goaha ine kobor on•aha indiba da•o dipet iani bidingo tale koborko man•sokujaenga.
Election official-rangni u•iatani gitade, Kakching a•jaoba election-ni kamko ka•enggipa police havildar Ibochouba Singh, an•tangna on•gipa silchidarechi maibake gomanenba siangna gita nangaha.
Pu•onaniko pring 7:00 bajio a•bachengatahaoba somoina skangan dingtang dingtang polling station-rango bang•bea manderangni riting dake senganirangko nikna man•aha aro attamni 4:00 bajiona kingkingan manderang bon•changgija dilgiparangko seokanio bakko ra•angtokaha.
2017 bilsini Manipur Assembly election-o BJP dol, dam 21 seat-rangko chee, NPP-ni MLA sakbri, NPF-ni sakbri, Trinamool Congress-ni saksa aro Independent membor saksa baksa nangrime sorkariko rikahachim. Indake ong•genchimoba, ia changode BJP, NPP aro NPF dolgittaman doltangari susaskaengachim.
NPP dolba ia chango dam 60 constituency-oni dam 38 constituency-rango candidate-rangko susaatenga aro ia changode an•tangtangan sorkariko rikna ka•dongskaengachim.
Manipur election-ni gnigipa bakko dam 22 constituency-rangna March 5 tariko ong•atskaenga aro vote-rangko March 10 tariko chanskana sienga.
