Guwahati, May 4: Assam Assembly election-o Bharatiya Janata Party (BJP)-chi dilenggipa National Democratic Alliance (NDA), seat-rangko bang•bate chena man•ahani gimin da•o Assam-o gittamgipa changna sorkariko rikna tariaha.
Assam-ni Chief Minister Himanta Biswa Sarma an•tangba Jalukbari constituency-o chepiltaina man•aha aro ia election-o BJP-ni chu•sokgipa ong•piltaianina an•tangni kusi ong•aniko parakataha.
Assam Assembly election-ni result-rangko Sombar salo parakatani ja•man, BJP-na kam ka•enggipa bang•bea manderang, Guwahati songjinmani Bajpayee Bhawan-o tom•chimonge, party-ni cheanina kusi ong•e maniangtokaha.
Kobor on•timgiparangni u•iatani gitade, election-o seokako man•gipa gital membor-rang, re•baenggipa May-ni 8 tariko ku•mikchetnaba gnang aro una skang BJP-ni dilgiparang, gital sorkariko rikpiltaina gita Assam-ni Governor-ko grongena sienga.
Ia election-o BJP-ni chegipa ong•anina an•tangni kusi ong•aniko parakatengon, ia cheaniara, manderangni Prime Minister Narendra Modi-o aro batanggimin bilsi 10-na NDA sorkarini kamrango bebera•ani aro ka•donganiko mesokani ong•aha ine Chief Minister Himanta Biswa Sarma aganaha.
Ia election-ni result-ko ua, namroro silroroani, me•chikrangna janggi tangani cholrangko on•ani aro Viksit Assam-na manderangni chakpaaniko on•ani ineba Sarma aganaha.
Ia election-o BJP-ni chu•sokgipa ong•anina ua, BJP-ni state president Nitin Nabin, Union Home Minister Amit Shah, party-ni dingtang dingtang dilgiparang aro party-na kam ka•giparangkoba mittelpilangaha.
Assam-o BJP-ni chegipa ong•anina a•songni Prime Minister Narendra Modi, Union Home Minister Amit Shah, Union Minister Sarbananda Sonowal aro gipin dilgiparangba, Assam-ni manderangko aro party-na kam ka•giparangko mittelpilangaha.
Ia election-o chu•sokgipa ong•anina aro manderangni ka•donganiko man•piltaianina Meghalaya a•dokni Chief Minister Conrad K Sangma-ba Assam-ni Chief Minister Himanta Biswa Sarma-na an•tangni namgipa skanirangko on•ataha. Salgro salaram jolrango namroro silroroaniko ra•bana gita bilakbegipa chakpaanirangko man•e on•ahani gimin Sangma, Union Home Minister Amit Shah aro BJP-naba namgipa skanirangko on•ataha.
