Shillong, Jan 9: Meghalaya a·doko BJP-ni dilgiparang meligrikna man·tokjaenga ine agananiko BJP-ni state president Ernest Mawrie jegalataha.
Iani bidingo kobor ra·timgiparang baksa agangrikengon, BJP-ni mitam dilgiparang, uamangni state president Ernest Mawrie-ni kamo kusi ong·jae uko ra·galchina dabitokenga ine adita salrangna skang, Meghalaya a·dokko nirokenggipa BJP-ni in-charge M Chuba Ao-ni agananiko Mawrie jegalataha.
Meghalaya a·doko BJP-ni state president-ko ra·galchina dabitokengani a·sel BJP-ni ning·o meligriktokjaenga ine agananiko adita salrangna skangsan Ao ku·chakahachim ine nikna man·a.
Indake ong·engon, uni kamo kusi ong·tokjaenga ine agananiko Mawrie jegalatenba, BJP-ni state vice president Bernard Marak baksana Garo Hills-ni bang·a dilgiparangan una chakpaanirangko on·enga ine parakatskaaha.
Rajabala bye-election-o susana gita candidate-ko seokaniara ua saksanni kam ong·jani gimin Rajabala bye-election-o amako man·anina ua saksankode matnangna nangja ineba Mawrie parakataha.
Uni kosako chakatenggipa memborrang baksa ua je kamni giminba agangrikna kusi ong·aigen ineba BJP-ni state president aro Meghalaya Chief Minister-ni adviser parakataha.
