Shillong, Feb 15: Saliram jol a·songgipinoni dakbewalrangko India-o ja·rikpaanirangko bon·atna nanga ine re·mikkange kamko ka·enggipa badiaba dolni bimingko ra·e ma·mong BJP dolni General Secretary Pa Arun Singh-ni soi gnang Meghalaya a·doko Valentine’s Day-ko manigiparangni kosako ja·ku de·na gita mikrakataniko on·e segipa chittini Social Media-o da·ororo giproroaniko nikenba Meghalaya BJP-ni padot Pa Ernest Mawrie, raken jegalangaha.
Ua chittiara manderangna tol·e gipatanisan ong·aia aro bang·gija salrangni gisepon a·doko MLA-na pu·onaniko ong·atnasiengani gimin ian badiaba political dolni BJP dolko ong·siatna ba galonna jotton ka·ani kamsa ong·a ineba BJP dolni padot jegale aganangaha.
Indake ong·engon, BJP dolni padot Pa Ernest Mawrie baksana gipin dilgiparang, ua tol·gipa chittiko Social Media-o giproroatgipa manderangni kosako Mongolbar salo Shillong-ni Sadar Police Station-o FIR-ko segatangaha.
