Tura, Feb 15: Bang·gija salrangni gisepon a·doko memborrangko seoktainasiengipana a·dokni dingtang dingtang songrangchina wenroroe campaign-ko ka·enganio, Meghalaya-ni skotong minister Pa Conrad Sangma, 56-Gambegre constituency-o NPP-ni candidate Pa Rakesh Sangma baksa da·o Congress dolni tikitchi susanasienggipa Pa Saleng Sangma-ko aro Congress dolko matnangangenba, ianpakni eleksino Congress dol ge·gni seat mangmangkoba chena gita cholrang dongja ine Mongolbar salo aganangaha.
56-Gambegre constituency-ni ning·o donggipa Melim songo NPP-ni candidate Pa Rakesh Sangma-na campaign-ko ka·chakangengon, NPP dol ku·rachakatangko chu·sokate on·na gisiko nange aro kakkete kamrangko ka·aha ine aganangenba, adita ge Civil Sub Division-ko aro C&RD Block-rangko re·anggipa bilsio a·doko songe on·angachi ru·uta bilsirangoni manderangni ka·oksie dabienggipako NPP-chi rikdilgipa sorkari chu·sokate on·na gita man·aha ine Pa Sangma parakataha.
NPP dolni candidate ong·e susanasienggipa Pa Rakesh Sangma-ni unomiting jinmana aganprakanganio, re·baenggipa eleksino unbaksa susapaenggipa candidate-rang uni kosako jaksi otna minggipin cholrang dongjae uni chong·mot ong·anikosan sing·doe roanirangko dakskaienga ine aganenba, Gambegre-ni manderang una ku·cholsan ong·e chakgrimna agangimin kattarangko pe·jawa ine ua joltangni manderango an·tangni ka·dongchakenganiko parakangaha.
Unbaksana, Pa Conrad Sangma-ni dilanichi Meghalaya a·dok namroro-silroroaniona gong·raken re·mikkangengaha ineba NPP-ni candidate Pa Rakesh agandapataha.
