Tura, Feb 15: Batanggimin bilsi bongana MLA ong•anio, Songsak constituency-ni MLA Mukul Sangma, Congress-oni Trinamool Congress (TMC)-ona katjojoe dongahani a•sel manderangni nangchongmotgipa kamrangkon chu•sokatna man•jaha aro iani a•sel Songsak-ni manderang neng•nikanirangko chagrongna nangtokaha ine Mongolbar salo, National People’s Party (NPP)-ni national president Conrad K Sangma, NPP-ni candidate Nihim D Shira-na campaign ka•engmiting somoio matnange aganangaha.
Ia chang Assembly election-o Mukul, Songsak constituency baksana Tikrikilla constituency-oniba susaengani gimin Songsak-ni manderangko mittelpilna changgijagipa ineba Conrad, Mukul-ko matnangataha.
Manderang TMC-ko namniktokjaengani gimin Mukul, constituency damgnion amako man•aigen ine janapatengon, ua seat damgniko chebebegenchimode badiako watgen aro badiako ra•gen, uko Songsak-ni manderang uo sing•na nanga ine NPP-ni national president parakataha.
NPP-ni candidate Nihim Shira, Songsak-ni manderangna kamko ka•na gita an•tangko on•kanggimin ong•a ine janapatengon, Nihim-ko dilgipa dake man•na Songsak-ni manderang namen rasong gnangbegipa ong•a ine Conrad parakataha.
“Bilsi bongana Songsak-ni MLA ong•ani somoio Mukul Sangma, changsaba angona re•bae Songsak-ni nanganirangni gimin angbaksa agangrikea dongja maina ua an•tangni a•gilsakon jakchakgija ong•e an•tangni manderangkode gualchipaha. Da•o ua Songsak aro Tikrikilla seat damgnioni susae, ia seat damgnikon chena ka•dongkuenga. Manderang uni tol•e ku•mikchetanirangko bebera•chana nangjaha aro seat bang•bate cheenba sorkariko rikna sienggipa NPP-nasa pu•ontokchina,” ine NPP-ni dilgipa aganaha.
Ia apsan salon NPP-ni national president, Gambegre-ni NPP candidate Rakesh A Sangma aro Rongara-Siju-ni NPP candidate Rakkam A Sangma-naba campaign ka•angaha.
