Shillong, Jan 19: BJP dolni padot Pa Earnest Mawrie, AITC dolko cha·bokna man·batsranggipa ine matnangatanio, West Bengal a·dokna maming silroro-nalroroaniko uamang ra·bana gita man·jaha ine Bristibar salo aganangaha.

“West Bengal-china re·angode nikaigen, mai obosta ong·enga aro maming namroro-silroroaniko Trinamool Congress a·dokna ra·baa dongja ine matnangatan baksa, Pa Mawre, ia bilsini July jao West Bengal-o ong·nasigipa panchayat election-o BJP dol gimik seat-rangkon chegen ineba aganangaha.

Adita salna skang North Garo Hills a·jao jinmana aganprakanganio, AITC-ni skotong dilgipa Ma Mamata Banerjee-ni Meghalaya-ni manderangna nambatgipa bil-sasonko uni dolsan on·na gita man·aigen ine a·kanganganina, Pa Mawrie, pilak gita nisusaate niode West Bengal a·doko maming tang·doani griko nikaigen ine aganenba, niam aro ge·etanirangko niatgenchimoba gipinrangona bate cha·bokbatsranggipa a·dok ong·a ine ua aganangskaaha.

AITC-ni WE Card scheme-rangba West Bengal-ni political dolni elekinna skang manderangna dakmikanisan aro ku·sikchi chu·sokataigipasan ong·aia ine aganangenba, West Bengal-ni giminde chinga chu·gimikkon tale ma·sia, maming namroro-silroroani dongja baksana niam aro ge·etanirangba namen namjabatroroenggipa a·dok ong·a ineba Meghalaya BJP-ni padot matnange aganangkuaha.