Tura, Nov 07: BMX cycle ba ramram jakkalronggijagipa rokomsa rengrengsilko dingtang dingtang bewalrango ga·na sapanichi a·songo susaangpilgipa aro a·dokoni saksa niksenggipa Te Winward Dilcheng Watre Sangma, politicalni a·selrangko janape Meghalaya TMC-ni State Youth Joint Secretary-ni kamko Sombar salo wataha ine koborna u·iataha.
Youth-ni dilgipani kamko watanio Te Winward Sangma-ni aganatani gitade, chugipa gadangoni, constituency-oni, block aro ward level committee-oni darang saksaba dolna kamko ka·ani bidingo una namgipa agan-ku·pattianirangko on·a dongja baksana gimik kamrangko ka·anion melianiba dongja ine parakataha.
Te Winward Sangma-ara, Boldamgre constituency-oni National People’s Party-ni da·o MDC ong·enggipa aro Ampati-oni TMC-ni MLA ong·enggipa Miani D Shira baksa re·baenggipa eleksino susaangna am·enggipa Stevie M Marak-ni jonggipa ong·a. Indake ong·engon, Te Winward Sangma, National People’s Party (NPP) dolo napangskanaba gnang ine ja·pangoni u·iataha.
