Boko, Feb 2: Assam a•doko Samagra Shiksha Assam (SSA)-ni bak gita Assam sorkari, vocational education program-ko a•bachengatahani gimin Boko-o donggipa Bondapara Anchalik (Regional) Higher Secondary School-ni chatro chatrirangba, an•tangtangni janggi tanganina gama ge•anirangko skie ra•na cholrangko man•engaha.
Bondapara Anchalik (Regional) HS School-ni Class IX-o poraienggipa sak 30 chatro chatrirang, agriculture ba gama ge•aniko optional subject dake ra•aha aro chatro chatrirangoni mitamde noktangtangon me•gimurangko ge•na a•bachengaha ine skulni agriculture trainer Jyotishka Bhuyan parakataha.
Class X-ni sak 40 chatro chatrirang aro Class IX-ni sak 30 chatro chatrirang, science-ni bewalo, me•gumi ge•ani, a•sal tariani aro karini me•su-samjakrangko ge•na skie ra•tokenga ineba Bhuyan aganaha.
Iandake jakni kamrangko skie ra•aniara chatro chatrirangna skie ra•mangmangaiasan ong•aija indiba tangka paisa man•dapanikoba ra•baenga ine ua aganaha.
Bhuyan-ni aganani gitade, ia curriculum-o 50 marks-ni theory aro practical porikkarangba donga aro chatro chatrirang, ia porikkarango pass ka•na nanga.
