Guwahati, Sept 8: Budbar salo, Assam a•dokni Jorhat jolo donggipa Brahmaputa chibimao ring bolgni chatinggrike a•sel ong•aha aro ia a•sel ong•anio, ring bolgnio songreenggipa manderangoni bang•an chio gimaenga ine kobor on•aha.
Koborko on•ani gitade, ia ring bolgnio komibeoba sak 100-mangni gita manderang songreengachim aro ia ring bolgni, Jorhat-ni Nimati Ghat-o chatinggrike a•sel ong•aha.
Ia ring bolgnioni bolsade sorkarini ring ong•achim aro ia ring, Majuli-oni Nimati Ghat-ona manderangko salbaengachim.
Ia ring bolgni chatinggrikani ja•man ia ring bolgnio songreenggipa manderang aro ma•manti bosturangkoba chio man•angaha ine kobor on•timgiparang parakataha.
A•sel ong•ani bakan ia biapona State Disaster Response Force (SDRF)-ni official-rang, sokbae gimaenggipa manderangko sandina a•bachengaha aro chioniko man•pilgipa bi•sa saksako man•chape bang•a manderangkon hospital-ona ra•angaha.
Ia a•sel ong•ani ja•mano Assam a•dokni Chief Minister Himanta Biswa Sarma-ba an•tangni suk ong•gijaniko parakataha aro chio gimaenggipa manderangko NDRF aro SDRF baksa ta•raken sandichina Majuli aro Jorhat-ni district administration-na ge•etaniko on•ataha.
Ia obostani bidingo nambate sandie ra•na gita ua an•tangba Bristibar salo Nimati Ghat-ona re•anggen ine u•iataha.
