Williamnagar, July 21: Garo Hills-na maming champengani gri bijoli on•china dabie Bristibar salo, dingtang dingtang NGO-rangni Williamnagar-o donggipa MeECL office-ko picketing ka•ani tom•tome matchotangaha.
Garo Hills-o bijoliko nambate on•china dabienggipani bidingo Power department-ni gita maming aganchakanirangko on•jaengani gimin iana skangba Williamnagar-ni dolbri NGO-rang, chong•motan GSU, FAF, FKJGP aro AIGU dolrang, MeECL-ni kosako poster campaign-ko dake jingjengatangahachim.
Poster campaign-ko dake jingjengatani ja•manoba maming aganchakanirangko on•jahani gimin ia dolbri NGO-rang, Bristibar saloni a•bachenge salgnina MeECL office-ko picketing ka•na tik ka•angskaahachim.
Ia dolbri NGO-rangni parakatani gitade, Garo Hills-na dontonggija bijoliko on•china, Power department-o mikkang niteanigri kam ka•giparangko rakkichina, Garo Hills-na MeECL-o chu•onga gita kam ka•giparangko rakkichina, Garo Hills-o kam ka•giparangko Khasi Hills-ona ra•jitangchina, MeECL-ko chalainio mikkang niteani gri ong•china, Shillong-o donggipa MeECL-ni head office-o A•chikrangkoba kamo rakkichina dabian baksana 2020 aro 2021 bilsirango Khasi Hills-o bang•en kam ka•giparangko rakkiahaoba Garo Hills-ode saksakoba kamo rakkidapjahani gimin jegale Williamnagar-o donggipa MeECL office-ko salgnina office picketing ka•enga.
Indake ong•engon, Sukrobar saloba apsan daken MeECL office-ko picketing ka•angkugen aro ia gnigipa salode bill collection counter-koba chipgen indiba line tarigiparangkosa maming champenganirang dongskajawa ine Eastern Zone GSU ni padot Saljrang Tenggrik R Marak parakataha.
