Shillong, Nov 2: Meghalaya a•dokni damgittam constituency-rango bye-election-ko ong•atanio National People’s Party (NPP), ia damgittamoni damgni constituency-rangko chena man•ahani gimin NPP-ni national president aro a•dokni Chief Minister Conrad K Sangma baksana NPP-ni dingtang dingtang dilgiparang, chong•motan a•dokni Deputy Chief Minister Prestone Tynsong, Cabinet Minister Sniawbhalang Dhar aro NPP-ni state president Dr WR Kharlukhi, ia constituency damgnini manderangko mittelpilataha.

Ia bye-election-o NPP-ni cheaniara manderangni NPP-o ka•donganiko mesokani gita ong•aha ineba Conrad Sangma parakataha.

A•dokni Deputy CM aro NPP-ni dilgipa Prestone Tynsong-ba ia constituency damgittamni manderangko mittelpilangengon, NPP-ni kosako manderangna tol•e campaign ka•na jotton ka•ahachim indiba ia constituency damgittamni manderang Congress-na bate NPP-o bebera•ani bataha ine parakataha.

Bye-election-o tangka paisarangko suala ine Congress dolni matnanganikoba NPP-ni dilgiparang raken jegalataha.

Ia bye-election-o seat damgniko chedapahani gimin da•o NPP dolo MLA-rang, sak 21-oni sak 23-ona tang•doangaha.