Shillong, Nov 2: Mongolbar salo parakatgipa Meghalaya a•dokni damgittam bye-election-ko Meghalaya Democratic Alliance (MDA) chegopna gita man•aha.
Rajabala, Mawryngkneng aro Mawphlang Assembly constituency-ni bye-election-rangko National People’s Party (NPP)-chi dilenggipa MDA altubeen chena gita man•aha aro ia damgittamoni Rajabala aro Mawryngkneng seat-rangko NPP cheenba, Mawphlang seat-ko UDP cheangskaaha.
MDA-o bak ong•paenggipa UDP, Mawryngkneng constituency-ode susagija NPP-ni candidate Pyniaid Sing Syiem-nan chakpaaniko on•skaahachim indiba NPP dolde ia constituency damgittamon susaangskaahachim.
Mawryngkneng constituency-o NPP-ni Pyniaid Sing Syiem, Rajabala-o NPP-ni Md Abdus Saleh aro Mawphlang constituency-o UDP-ni Eugeneson Lyngdoh, chegipa ong•skaaha.
Ia damgittam constituency-ni MLA-rang ia bilsini a•bachengachibara siangahani gimin ia damgittam Assembly constituency-ni bye-election-ko re•anggipa October 30 tariko ong•atangahachim. Ia damgittam constituency-oni Rajabala aro Mawryngkneng constituency-de Congress dolni bilakgipa constituency-rangan ong•achim.
2018 bilsini Assembly election-o ia Rajabala aro Mawryngkneng constituency damgnikon Congress cheahachim. Rajabala-o sianggipa MLA Dr Azad Zaman cheahachim aro Mawryngkneng constituency-o David A Nongrum chegipa ong•skaahachim.
Indake ong•genchimoba, ia bye-election-o ia constituency damgnikon NPP chee, Khasi aro Jaintia Hills a•jarangoba NPP-ni bilakbaenganiko mesokani gita ong•aha.
Ia constituency damgnio gipin candidate-rangba susaahaoba Congress aro NPP dolgnini gisepo bilakbate susagrikaniko nikna man•aha.
Ia constituency damgniko cheahani gimin NPP-ni national president aro Meghalaya a•dokni Chief Minister Conrad K Sangma-ba, an•tangni kusi ong•aniko parakataha aro ian Meghalaya a•doko MDA sorkarini kamrangko mesokani chin gita ong•enga ine parakataha.
Congress dolni ning•o meligrikgijanirang dongani a•selan ia chang by-election-o Congress dol chu•sokgipa ong•na man•jaha aro batanggimin bilsirango ru•utbea somoirangna sorkariko rikahaoba maming namroro silroroaniko nikna man•jahani gimin ian manderangni Congress dolni kamko jegalani gitaba ong•skaaha.
2023 bilsini Assembly election-na da•o ja 15-mang dongkuengani gimin ia bye-election-ni result-ara NPP-na kamrangko ka•soanio bilakbatatani gitaba ong•aha.
Rajabala constituency-o NPP-ni candidate Abdus Saleh, 11,812 vote-rangko man•e, 9885 vote-rangko man•rikgipa Congress-ni candidate Hasina Yasmin Mondal-ko 1927 vote-rangchi amchepatna man•aha aro ian una bilsichetni ja•man MLA ong•piltaina cholko on•aniba ong•aha.
Mawryngkneng constituency-oba NPP-ni candidate Pyniaid Sing Syiem, 14,177 vote-rangko man•e, 12361 vote-rangko man•rikgipa Congress candidate Highlander Kharmalki-ko 1816 vote-rangchi amchepatskaaha.
Mawphlang Assembly constituency-o UDP-ni candidate aro robol kal•na changanina mingsing minggamako man•gipa Eugenson Lyngdoh, 13,285 vote-rangko man•e, 8,884 vote-rangko man•rikgipa Congress candidate Kennedy Khyriem-ko 4401 vote-rangchi amchepatskaaha.
Eugeneson-ni pagipa Synstar Klas Sunn sagian, Mawphlang constituency-ni Independent MLA ong•achim aro ua 2021 bilsini September 10 tariko COVID-19 man•e siangahani gimin Mawphlang constituency-ni bye-election-koba ong•atna nangahachim. Sunn sagi, an•tangde UDP-o napjahaoba UDP baksa nangrime kamko ka•skaahachim aro uandaken uni siangani ja•man UDP-ni dilgiparang, uni depante Eugeneson-ko UDP-ko nape ia bye-election-o susachina didiaha.
Mawphlang bye-election-o NPP-ni candidate Lamphrang Blah, 5,103 vote-rangko man•rikskaahachim.
