Shillong, Oct 21: By-election-rang matchotangani ja•mansa petrol aro diesel-rangni dam tang•doani bidingo Cabinet tom•e chanchirimgen ine Bristibar salo, Meghalaya a•dokni Deputy Chief Minister Prestone Tynsong parakataha.
Petrol aro diesel-ni kajinarangko watani giminde ua mamingkoba janapskajaha.
Tynsong-ni parakatani gitade, ia bilsini gisepon sorkari, petrol aro diesel-ni kajinako gong 6/- komiatahachim.
Petrol aro diesel-ni dam tang•dororoengani gimin sorkariko matnange aganengani giminba ua Congress dolko jegalataha.
“Meghalaya a•dokosan an•ching gari gorarangko jakkalenga ong•ja indiba pilak biaprangon jakkalenga aro iako an•ching ma•sina nanga,” ine Tynsong aganaha.
Iani bidingo a•dokni Chief Minister, Union Finance Minister baksa agangrikmanaha aro ia neng•nikaniko namatna gita Finance minister da•o cholrangko sandienga ineba a•dokni Deputy Chief Minister parakataha.
Da•o election sepangengahani giminsa petrol-ni dam bariani gimin Congress dol, sorkariko matnangna jotton ka•enga indiba manderang iako ma•sisretna nangja ineba Tynsong aganaha.
