Shillong, Mar 1: Mongolbar salo, Upper Shillong-o donggipa St Paul’s Seminary School-ni Diamond jubilee-ko manianio Meghalaya a•dokni Chief Minister Conrad K Sangma-ba dongpae bak ra•angaha aro ia tom•anio ua jinmana aganprakangengon, Catholic skulrangan chatro chatrirangko mande ong•atna dakchakenga ine mittelpilaniko parakangaha.
Bilsi 75-na ia skulko name chalaibaahani gimin skulni dilgiparangko mittelpilangengon, iandakgipa skulrangan chatro chatrirangko mande ong•atna gita tarisamsoenga ine Chief Minister parakataha.
Sangma-ni aganani gitade, uni pagipa sagikoba Catholic Mondolini Father-rangan namao dal•ate mande ong•ataha aro iani giminsa uamangni nokdangba da•o namgipa gadangona sokdopaaha.
“Angni pagipa sagikoba Mondolian dal•ataha aro uaba Catholic Father-rangni nirokanio dal•bagipa mandesa ong•a. Catholic father-rang uko Isolni nangnikani gita dal•ataha aro iani a•selsa da•alo chingaba ia gadango ong•enga,” ine Conrad aganaha.
Namgipa bewal, bamgipa ong•ani aro bebera•ani gride mande chu•sokgipa ong•na man•jawa ine chatro chatrirangna agan-ku•pattianiko on•angengon, Mondolirangosa iandakgipa bewalrangko chatro chatrirangna skia ine Chief Minister parakataha.
Ia program-ko ong•atanio dongpae bakko ra•anggipa gipin manderangara, Shillong-ni Archbishop Victor Lyngdoh, C&RD Minister Hamletson Dohling, Urban Affairs Minister Dasakhiatbha Lamare aro gipinrang ong•a.
