Jowai, Nov 8: Karkanarang aro karkanani bosturangko salenggiparangni gisepo adita meligrikjaenganio a·dok sorkari maming bak dongja maina mal gate salenggipa garirangna damrangko tang·doate baktangkode chinga matchotataha ine a·dokni skotong minister Pa Conrad K. Sangma Sonibar salo aganaha.
“A·dok sorkari, bilsi 18-rang gapnakpila ja·mansa damrangko gital dake tang·doatani gimin tik ka·angaha,” ine Pa Sangma kobor setimgiparangna agan-talataha.
Batanggimin 2002 bilsionin damrangko nipiltaikujachim, uni gimin damrangko gital daktaina nangchongmotenganiko MDA sorkari nangnike mija jagittam ba jadokrangni gisepo chinga iako tik ka·angaha. Damrangko tang·doatani ja·man, karnanarang aro karkanani bosturangko salenggiparangni gisepo adita meligrikgijanirang ong·enga, iade sorkarini tik ka·anganio indita bak nangeja,” ine Pa Sangma agandapaha.
Uni ia kattarangko agananiara, Jaintia Hills Truck Owners Association (JHTOA), All Jaintia Hills Clinkers & Cement Association (AJHCCA) aro Meghalaya Truckers Union (MTU) gimik donggipa Joint Action Committee (JAC)ni dondikgija jingjengattaipilengani gimino ong·aha. Indake, Tuber Kmaishnong songni ning·o Tahkhniang jolo cement aro clinker gate salbagipa trak garirangko JAC champengsoeming uamangko karkanarangchinan watpilataha.
Sonibar salo East Jaintia Hills district-o official tom·anio bakko ra·na gita skotong minister-ni re·angengmitingo JAC-ni memborrang national highway rama jolo uamangni namnikgijanirangko janape segipa lekka pal·takrangkoba mesoksotokaha. Iani bidingo JAC-ni aganani gitade, deputy commissioner-ni mija Bristibar salo tom·e chanchirimna okamao ka·dongatanirangko on·genchimoba All Jaintia Cement Manufacturers Association (AJCMA)ni ning·o cement-ni karkanarang ua gital damrangko ja·rikjaha.
Iani bidingo sing·on, karkanarang aro mal-bostu watenggiparangni gisepo mamla ong·katenganiko namatna nanggen aro dingtanggrikaniko namatna gita cholrang donga kakket sorkari iako niatgen ine Pa Sangma aganchakaha.
