Agartala, Nov 8: Mija Sonibar walo Jammu aro Kashmir-ni Machil sector-o bobil dolrangni kosako chelchakgipa sipairang nangrime am·sandianiko dakango Tripura-oni saksa BSF jawan so·ota man·aha ine koborko man·soaha.
So·ota man·gipa Border Security Force (BSF) jawanko Sudip Sarkar ine ma·sina man·aha. Butan ine jekon mingklakachim aro jean Tripura-ni skotong Agartala-ni Banamalipur Dhaleswar-oni ong·a ua, 169 Bn BSF-ni sipai saksa ong·achim.
Pakisatan-ni dakchakako man·gipa bobil dolrang baksa Kashmir-o gogrikao, ua gulli nanga man·e siangaha, indake bobil doloni saksaba gogrikao so·ota man·aha. Uni siani koborrang da·al (Robibar) salni bakosa nokdangni manderangonade sokbaaha.
A·songko chelchake janggitangko on·chakgipa sipaiara Agartala-ni Ramakrishna Vivekananda-o poraiaha ine uni jonggipa ba adagipa Dipankar Sarkar koborna aganaha. Butan, 2000 bilsio BSF-o napangaha, indake bilsi 20-rangna kingking kamo dangdike on·ani ja·man ua ia bilsion kamoni neng·taknaba am·engjokchim.
Sianggipa sipaini jikgipa aro demechik sakgnian da·ode West Bengal-ni Cooch Behar-osa dongtokenga. Ma·gipa baksa mija Sukrobar salo ua bon·chote golpogrikaha, ine sianggipani jonggipa ba adatang agandapaha.
Da·al pringo saksa BSF official nokona call ka·ateming uni siani koborko on·ataha. Indake ong·engon, a·songna janggiko on·chakgipa jawan-ni manggisiko Agartala-o donggipa uni nokona Sombar 2 baji dakarango sokatbagen ineba koborko man·sodapaha.
