Guwahati, Nov 12: India sorkarini Ministry Of Tourism, Salgro Salaram jolo donggipa a·dokrangko ra·dona chang 13-gipa International Tourism Mart (ITM)-ko November jani 13 tarikoni 16 tarikona Sikkim, Gangtok-o ong·atanggen. Ia tom·bimonganiko Tourism and Culture-ni Union Minister Gajendra Singh Shekhawat-ni jakchi, Sikkim a·dokni skotong Minister Prem Singh Tamang, Arunachal Pradesh-ni Skotong Minister Pema Khandu baksana Salgro Salaram jolo donggipa dam 8 a·dokrangni tourism official-rangni dongpaanio oprake on·anggen.
HVS-ANAROCK-ni “Northeast India : A Hidden Gem for Tourism Potential,” ine katta bichongko on·e segipa report-o mesokani gitade, batanggimin 2024 bilsio a·songtangoni 0.43% mang aro 1.17% mangni gita gipin a·songoni songrebagiparangsan dong·aiani gimin ian bang·a biaprangan songree nikugijagipa biaprang ong·e ine mesoka.
ITM, ian Tourism Ministry-ni Salgro Salaram jolo donggipa a·dokrangko ra·doanina bilsio ong·atgipa mongsonggipa tom·bimongani ong·a. India-ni Salgro Salaram jolko nitogipa biaprangna, apalbegipa jatni dakbewal rikbewalrangna aro a·briarigipa biaprango songrena cholko on·anina India-ni “Astha Lakshmi” ineba agantoka. Ia bilsio uamang manderangna aro samtangtango donggipa ong·telaigiparangna simsak nirokanina didianiko ra·bagipa Travel for Life campaign-na chakpaaniko on·enga.
A·gilsak gimiko samgri gama ge·ani aro samtangtango donggipa ong·telaigiparangna maming nangchakea grigipa janggi tangani bewalko ja·rikanina mingsinggipa Sikkim a·dokko, samtangtango donggipa ong·telaigiparangko naljoke rakkian baksana jolo songdonggipa manderangna namgniko ra·bana man·gipa tourism ine jinmana mesoke on·anggen.
Spain, Thailand, France, Russia, Germany aro Vietnam-ko man·chape dam 19 a·songoni seoke watatako man·giparang, sak 39 International Tour Operator-rang, sak 50 bregiparang aro sak 91 pale simme cha·giparangba iano dongpae bak ra·angpagen. Ia tom·bimonganio panel talks ba agan-golpogrikani, bading chiwalgiparangni tom·bimongani baksana film tourism, homestays, youth entrepreneurship, digital technology aro pangkamgipa tourism-ni bidingoba session-rangko ong·atanggen.
Uasan ong·aigija ia tom·bimonganio jatni bewalo chrokmesaanirangko mesokangan baksana uamang Rumtek Monastry, Do Drul Chorten aro Namgyal Institute of Tibetology-rangonaba re·anggen. Iano jinmana mesoke on·anio buringni do·o matrang, chio songreani, jaktangchi sol·a repani, jatni bewalo cha·a ringani, dingtang dingtang jatni manianirang aro a·briarigipa songreani giminba jinmana mesoke on·anggen.
Ia mongsonggipa tom·bimongani jamano, delegation-rang ba seoke watatako man·giparang Salgro Salaram jolo donggipa dingtang dingtang biaprangona songreangenba jolo cha bagan dakgiparang, a·brini ramarang, dingtang dingtang jatni manianirang baksana jolo songdonggipa dingtang dingtang jatni dakbewal rikbewalrangko re·ange nianiko dakanggen.
Na·simang iakoba nina man·gen:
Na·simang iakoba poraina man·gen: Congress, a·song gimiko Signature Campaign-ko ong·atanio, 10,000 mangni gita signature-rangko M’laya-o man·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
