Tura, Nov 9: Chang 47-gipa 100 Drums Wangala manianiko Bristibar salo, Handloom aro Handicrafts Exhibition-ko do•ga oanichi, Jengjal-o donggipa Baljek Airport-o a•bachengataha aro ia manianiko a•bachengatanio GHADC-ni Chief Executive Membor (CEM) Albinush R Marak, Deputy CEM Nikman Ch Marak, EM Nathawal S Marak, EM Heninson R Marak, Joint Secretary Peter R Marak, 100 Drums Wangala Festival Committee-ni Chairman Ronald Rikman Ch Sangma aro gipinrangba bak ra•angtokaha.

Ia bilsini 100 Drums Wangala manianiko a•bachengatanio GHADC-ni CEM, mongsonggipa sokgipa ong•e jinmana aganprakangengon, dingtang dingtang neng•nikanirang donggenchimoba, ia 100 Drums Wangala manianiko bilsiantian ong•atengani gimin ia manianiko a•bachengdilgipa pagitchamrang aro Wangala Committee-ni membor-rangko mittelpilangaha.

Jatni daka rikanirangko ripinge rakkiangkuchina gitaba ua Wangala Committee-ni membor-rangko didiangaha.

100 Drums Wangala manianiko sokachakna gita Chibragre Wangala A•damon biapko ra•manahani gimin mikkangchi ia biapo A•chikrangni daka rikani aro ma•manti gam-jinrangko mesokna dingtangmancha museum-ko kulichina gitaba GHADC-ni CEM didiangaha.

Ia bilsio 100 Drums Wangala manianiko Jengjal-ni Baljek Airport-o sokachakskana nangahani gimin 100 Drums Wangala Festival Committee-ni chairman Ronald Rikman Sangma, jinmana talate on•angskaengon, Wangala A•dam Chibragre-ona tarianggipa dolongko da•o metre-gni ong•e chi mripahani gimin Wangala manianiko ong•atani somoio manderangna re•a doanio neng•nikani ong•gen ine nikenba, ia chang 100 Drums Wangala manianiko Jengjal-ni Baljek Airport-o ong•atskana nangaha ine parakataha.

Ia 100 Drums Wangala manianiko a•bachengatani salo, dingtangmancha jatni kal•susaanirang, jekai Wa•pong Sika, Jakpong Pe•a, An•ding Oka, me•chikrangna Rong•ma Chilsusaa, me•asarangna Rong•ma De•susaa aro budu salgrikanikoba ong•atangaha.

Budu salgrikanio Mitela Group chegipa ong•aha aro changdokna kingking chee dongenggipa Rongkhon dol, gnigipa biapko man•rikskaaha.

Ia Wangala maniani skanggipa salo, Tura Government College aro Assam-oni Garo Cultural Forum dolni gitaba Wangale mesokangaha.

Iakoba poraie nina man·gen: Assam-ni Shishu Sarothi School-o poraienggipa bi•sarang Diwali-na ge 5000 chakkirangko taria

WATCH:

Find latest news from every corner of Northeast India at hubnetwork.in, your online source for breaking news, video coverage.

Also, Follow us on-

Twitter-twitter.com/nemediahub

Youtube channel- www.youtube.com/@NortheastMediaHub2020

Instagram- www.instagram.com/nemediahub