Shillong, June 24: National Highway aro State Highway-rango kuligipa pilak check gate-rangkon chipchina gita KHADC aro JHADC-na a•dok sorkari ge•etaniko on•angaha.
Bristibar salo, Meghalaya a•dokni Chief Minister Conrad K Sangma-ni dilanichi, Deputy Chief Minister Prestone Tynsong, District Council Affairs (DCA) Minister Lahkmen Rymbui aro ia damgni ADC-ni CEM-rang baksa tom•aniko ong•atanio ramarango kuligipa check gate-rangko chipchina ge•etaniko on•angaha.
DCA Minister Lahkmen Rymbui-ni parakatani gitade, national highway-rango check gate-rangko kulina gita ADC-rango bil dongjachim.
Ia tom•ani ja•man, KHADC aro JHADC dolgnian, check gate-rangko chipna ku•rachakangaha.
Check gate-rangko kulina nanggenchimode ADC-rang, sorkarina proposal-ko on•na man•gen aro ia proposal-ko niesa sorkari nanga gita ja•kurangko de•gen ineba DCA Minister parakataha.
