Shillong, Aug 16: Re•anggipa August-ni 13 tariko Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko police-rangni chadrape so•otani bidingo judicial inquiry-ko dakchina ge•etgen ine Sombar salo Meghalaya a•dokni Chief Minister Conrad K Sangma parakataha.
HNLC-ni gitcham dilgipako so•otani gimin Robibar salo, Shillong songjinmani Mawlai-o manderang jinma jegalgrime re•jomanirangko dakahachim aro Shillong songjinmao mitam manderang, police-rangni silchidarerangko ra•sekan baksana police-rangni garikoba so•e galahachim.
Indake ong•engon, Sombar attamchibara a•dokni Cabinet tanggitik tom•aniko ong•atangenba, HNLC-ni gitcham dilgipako so•otani bidingo judicial inquiry-ko dakatna tik ka•angaha aro peace committee-koba songe donangjolaha. Ia peace committee-ko a•dokni Deputy Chief Minister Prestone Tynsong baksana sakgni Cabinet Minister-rang, chong•motan Hamletson Dohling aro Renikton Lyngdoh dilanggen.
Ia peace committee-o dingtang dingtang dolni dilgiparangkoba membor dake seokanggen ineba Chief Minister parakataha.
Shillong songjinmao curfew-ko Budbar pring 5:00 bajiona ra•gatangkugen aro internet-koba konta 24-na chipe donangkugen ineba Chief Minister parakataha.
A•dokni Home Minister Lahkmen Rymbui-ni kam watani bidingo janapatengon, iani bidingo ua name chanchie niengkua ine Chief Minister parakataha.
Indake ong•engon, a•doko niam retirangko nirokna gita dingtangmancha sub-committee-koba songenga aro ia sub-committee-ko Chief Minister, Deputy Chief Minister aro Home Minister dilanggen ine Sangma parakataha.
