Shillong, Nov 26: Cherry bolara Himalaya a•bri jolrango chagipa bol ong•genchimoba Shillong-oba ia bolko bang•en nikna man•a aro uandaken da•o ia Cherry bol bibalani somoi ong•engaha.
Cherry bolrang da•o bibalengahani gimin Shillong songjinmarango niwilwale nigenchimode pilak biaprangon gitchakmrang aro baring rongrangchi nitobee cherry bolni bibalarangko nikna man•engaha.
Ia Cherry bolni nitobee bibalaniko Shillong songjinmao Cherry Blossom Festival-ko ong•atanichi manirongenga aro ia manianiko re•anggipa 2020 bilsio COVID-19 sajinmani a•sel ong•atna man•jahaoba ia bilsiode sajinmarang adita komiangahani gimin niamrangko ja•rike ia manianiko ong•atskana gita cholko man•enga.
Meghalaya a•doko sajinma dongkuengoba ia Cherry Blossom Festival-ko November 25 tarikoni 27 tarikona dingtang dingtang program-rangko ong•atanichi manina gita cholko man•enga.
Ia chango Cherry Blossom Festival baksana Shillong Literary Festival-koba skanggipa changna ong•atenga aro uandaken sea jotanio gisik nanggipa manderang, ia festival-o an•tangni sea jotanirangko mesokna aro changgipa sapgipa manderangoniko skie ra•skana cholko man•enga.
Sea jotanirangkosan ong•aigija ia festival ba manianio git ring•susaani, fashion show, chu tariani, Japanese aro Korean-rangni cha•ani tariani, Mr & Miss Shillong Cherry Blosson, Mrs Shillong Cherry Blossom aro uandakgipa dingtang dingtang program-rangkoba ong•atenga.
