Jowai, Nov 26: Sukrobar salo, West Jaintia Hills a•jani Dairy Office-ni gita National Milk Day-ko Mooralang-o donggipa Dairy Compound-o manidilangaha aro ia salko manianio jolni MLA Wailadmiki Shylla, mongsonggipa sokgipa ong•e bakko ra•angaha.Ia program-ko ong•atanio Jowai-ni MLA jinmana aganprakangengon, dudara maikai mandena gamchatgipa ong•achim, uarangni gimin talataniko on•angenba, dudrangko chu•onga gita man•china matchurangko bang•bate jilchina gita matchu matte jilenggipa manderangko didiangaha.

Namgipa dudrangko manderangna on•engani gimin matchu matte jilgiparangko mittelpilangengon, dudoniko tarigipa ma•manti bosturangko bikotanichi an•tangtangni janggi tangani gadangrangko nambatatchina gitaba ua didiangaha.

Sorkarini a•bachengatgipa Milk Mission-ni gimin janapangengon, ia mission-chian sorkari, matchu matte jilenggipa aro game ge•e cha•giparangna loan-rangko on•enga ine Shylla parakangenba, an•tangtangni man•gnina sorkarini on•enggipa cholrangko ra•china didiangaha.

Ia tom•anio dongpae jinmana aganprakanggipa gipin manderangara, Jowai-ni ADC PK Boro, Jowai-ni District Animal Husbandry & Veterinary Officer Dr I Kjam aro gipinrang ong•a.

Bilsiantian ia National Milk Day-ko Dr Varghese Kurien-ni atchiani salko maniani bak gita a•song gimikon November-ni 26 tariko manirongenga.