Tura, June 17: Bristibar walo, Chibinang jolni Kalapani songo gimagipa bi•sa sakgittamko, samba jolo donggipa songni nok te•saoniko maming a•sel gri jokatpilna man•aha.
Ia bi•sa sakgittamni gimaani ja•man, chio sripahakon ine songni manderang chanchichiptokengachim indiba Sukrobar pringnian police-rang, ia bi•sarangko sandina a•bachengatenba, samba jolo donggipa song damsani nok te•saoniko maming a•sel gri man•pilaha.
Batanggimin salrangonin mikkarang dontonggija jime waengani a•sel Chibinang aro Kalapani songrangoba chi bananirangko nikna man•engahachim.
Bristibar walo, Kalapani songni bi•sa sakgittam nokona sokangpilahaon, ia bi•sarang chio sripahakon ine songni manderang chanchichipenba, police-rangna u•iatahachim. Koborko man•soani ja•man police-rang, Sukrobar pringnian ia bi•sarangko sandina a•bachengataha aro uandaken ia bi•sa sakgittamko samba jolo donggipa Bangalkata songoniko man•pileaha.
Indake ong•engon, da•ororo a•dok gimikon mikkarang dontonggija waengani a•sel bang•a biaprangon chi banani aro a•a be•anirangko nikna man•engani gimin a•doko pilak skulrangkon chutti watna tik ka•ahani gimin a•dokni bang•bata ma•a paarangan a•dokni Chief Minister Conrad K Sangma-ko mittelpilataha.
Mitam biaprangode aro mongsongbate songadam nokadamrangode bi•sarang, chirangko batesa skulrangchi re•na nangtokengani gimin da•o gita mikka wabebekani somoirango skulrangko chipe donatchengahani gimin bang•a ma•a paarangan Chief Minister-ko mittelpilangaha.
