Shillong, Nov 26: Darangchiba namatna amsokgijagipa neng·nikanirangko chagrongenggipa Tibet a·songni ku·rangrang da·alo Meghalaya a·dokni skotong Shillong-onaba sokeaha, jemangan Chinese sorkarini uamangko ong·gija dake sinjetanirangni bidingo Tibetan Women’s Association (TWA) Central Committee ku·rangko on·angaha.
Iani bidingo Bristibar salo Shillong-o press conference-ko ong·atao kobor ra·timgiparangna aganangengon, agangrikaniko dondipatgipa Sino-Tibet-ni mamlao uamangni rongtalgipa dilgipa Dalai Lama-ni baltigiparang baksa Middle Way Approach-o pangchake agan-golgrikaniko dakpiltaina gita China a·songni dilgiparangko gronge agangrikchina India sorkariko chinga mol·mola ine TWA -ni padot Tenzing Dolma parakataha.
Ru·utgija salrangna skang, an·tangni gita mikkangchi kamrangko ka·gnigipani bidingo gronge agangrikna Chinese sorkari, Dalai Lama-ko okamaha, indiba ian Tibet a·song baksa nangchapgipa mamlaode ong·jachim jenan dolgnini gisepo agangrikani maming gamchatja ine aganenba, Tibet a·songo songdonggipa manderangni namgnina Chinese sorkari, chingni dilgiparang baksa agangrikna cholko on·na nanga maina chinga pilakni gitan sinjetanirangko man·aha aro koborrangko jakgitele on·na man·jani a·sel chinga ku·rangrangko on·na gita cholko man·paja ineba Tenzing agandapataha.
Unbaksana, batanggimin bilsi 26-rangna kingking gimachipenggipa Tibet a·songni 11-gipa Panchean Lama, Gendhun Choekyi Nyima-ko watpilchina gita a·gilsak gimikni mol·molanio jak on·pachina India sorkariko aro India-ni dilgiparangkoba TWA mol·molatjolaha.
‘Toromni gita meli-nangrimaniko tang·doatanio India a·songni kamko ka·engani gimin aro Buddhism toromara India-onin a·bachengbaaniko janapjole aganengon, Tibet a·songo toromni gita sinjetanirangko man·enggipa mamlarangni bidingo namatna kam ka·chinaba TWA-ni padot India sorkariko mol·molangaha.
China a·songara, Tibet-o songdongenggipa jatni pilak dakbewal-rikbewalrang aro toromo jakgitel ong·ani kosako sinjetanirangko on·baenga aro Chinese sorkari mande jatni bilrangko maming dakeba dal·e ra·ja, indiba Olympic Games-ko ia a·songo soka-chakna gita pakwatataha, uni gimin re·baenggipa 2022 bilsio ong·nasienggipa Winter Olympics-ko China-o ong·atjachina International Olympic Committee (IOC)ko mol·molatan baksa, pilak susagiparangkoba bakko ra·egija uamang baksa ku·cholsan bakrimaniko on·pachinaba TWA-ni padot mol·molangaha.
