Shillong, Nov 26: Meghalaya a·doko All India Trinamool Congress (AITMC)-ba da·o ong·katahani gimin gipin political dolrang baksa agangrikani cholrang donga ine Sukrobar salo a·dokni gitcham chief minister Mukul Sangma, chinko mesokataha.
Mukul Sangma-ko man·chape Congress dolni sak 12 MLA-rang, Bristibar salo AITMC baksa bakrimangskaahachim ine nikna man·a.
Indake ong·engon, Meghalaya a·doko sawarang AITMC-ko dilgen, ja·mano uamang kobor ra·timgiparangna u·iatgen ine Sukrobar salo Mukul Sangma parakataha.
Congress dolni sak 12 MLA-rang, bil dongjahani giminsa ong·kate kataha ine Meghalaya Pradesh Congress Committee (MPCC)-ni president Vincent Pala-ni matnange agangipa kattarangni gimin sing·on, uamango bilrang komiaha ong·ja aro uamang sikgenchimode bilon ong·kuna man·genchim ine Sangma parakataha.
Uamangni Congress doloni ong·kate AITMC-o napskaahani gimin uni ripengrangba uamangko mittelatenga aro uamang manderangni bakrimanichi 2023 bilsio gital sorkariko rikgen ineba Sangma, an·tangni ka·dongsoenganiko parakataha.
