Tura, Jan 26: Meghalaya a•dokni Skotong Minister Conrad K Sangma, at•chidaldaloni bilsi 8-ona bi•sarangni chu•gimik dal•roroanina aro an•o dongenggipa ba bi•sa bakgitchakna sok on•enggipa ma•giparangna simsakaniko gisiko on•bate, Meghalaya Early Childhood Development Mission-ko a•bachengatani gimin u•iatangaha, jeon bi•sarangko gisikni aro be•enni gita dal•roroanio dakchakaniko on•a baksana nama cha•a ringanirang aro lekka pora bidaniko on•e an•seng baljoke donganiko man•chapa.
Chang 76-gipa Republic Day-ni salko manianio jinmana aganprakatengon, Anganwadi Center-rangko chasong gitalni “Saksham Anganwadis”-ona tang•dobatatan baksana ia center-rangna dakchakniko on•a gita sak 10,000 SHG-ni skigiparangna training-rangko on•a tarisamsoanirangko Skotong Minister jinmana parakataha. NEP 2020-ko a•bachengatna gita ia gital Anganwadi Center-rangko sorkarini primary skul sambarango rikanggen.
Skotong Minister, sanna bannanirango nambatroroani gimin aganengon, bilsi 5-ni gisepo bi•sa an•pakani somoio ma•giparangni siani 53%-ni gita aro bi•sa bakgitchakrangni siani 40%-ni gita komiaha ineba janapataha. Lakh 3-na batpile an•o donggipa ma•giparang Chief Minister Safe Motherhood Scheme-rangni gita dakchakanirangko man•aha, jean re•a do•ani, porikka ka•e niani aro an•pakani somoio neng•nikanirangko olgrokatna dakchakaha. Uasan ong•aigija, ua sanna bannaniko manderangona altuae sokatna man•a gita Community Health Center-rangko nambatatani giminba aganangaha.
First Referral Units (FRUs) ingipa gital health center-rangko Bhoirymbong, Resubelpara, Ranikor, Mawphlang aro Pynursla-o kulie on•angaha ine Skotong Minister u•iatangaha. Re•anggipa bilsio, ge 65 gital health Sub-Centre-rangko rikangaha aro 2025 bilsio ge 90 Sub-Centre-rangko rikangkugen.
Meghalaya a•doko sanna bannaniko nambatatna gita Health Department, a•gilsakni u•i ma•sigipa dolrang baksa kamrangko ka•enga ine Skotong Minister u•iatangaha. Re•anggipa bilsio Meghalaya Health Insurance Scheme (MHIS)-niko dakchakaniko am•gipa bang•bataniara, iano manderangni ka•donganiko mesoka ine aganengon, sak 100 MBBS chatro chatrirang-ko bilsianti nokchakna man•gipa medical college-rangko Shillong aro Tura-o rikengaha aro Shillong medical college-kode ia bilsian a•bachengatgnok ineba ua u•iataha.
Meghalaya a•dok sorkari chatro chatrirangko porikkao name dakna dakchakaniko on•a aro skianirangko namdapatna miksonge kamrangko ka•enga. “CM IMPACT” ingipa gital program-ni gita chatro chatrirang aro skigiparangna guidebook-rangko suale on•enga.
Skotong Minister, Meghalaya a•dokni skanggipa university, Captain Williamson Sangma State University-ko a•bachengate on•ani gimin jinmana parakataha, jean University Grants Commission (UGC)-ni gita ra•chakanikoba man•aha. Ia university-o undergraduate aro postgraduate course-rangko dakna napgipa chatro chatrirang Common University Entrance Test (CUET)-ko on•a gita nangjawa ine aganan baksana da•o dipet ge 8 college-rang ia university baksa bakrimna gita dorgasto-rangko galaha ineba ua u•iataha.
A•dok sorkari, ia state university-na Shillong Campus-ko riknaba miksongenga ine Skotong Minister aganengon, chubata gadango porainiko altubatatna gita 2024 bilsio Rongjeng-o gital degree college-o klas ra•anirangko a•bachengataga aro Patharkhmah-ni ge•sagipa degree college-ko 2025 bilsio a•bachengatskagen ineba ua agandapangkuaha.
Na·simang ia video-koba nina man·gen:
Na·simang iakoba poraina man·gen: W’nagar-oba a·songni chang 76-gipa Republic Day-ko manianga
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
