Shillong, Jan 12: Re•baenggipa 2023 bilsini Assembly election-na skang, Meghalaya a•doko Congress dolni mitam MLA-rang, National Peoples Party (NPP) aro Bharatiya Janata Party (BJP) dolo napskana miksongenga ine agananiko Meghalaya a•dokko nirokna dongipa AICC-ni dilgipa Manish Chatrath jegalataha.
“Chingni PCC, MLA-rang, MDC-rang aro pilakan ku•cholsan ong•e dongengani gimin iandake agananiara kakket ong•ja,” ine Chatrath parakataha.
Congress dolni adita sak MLA-rang, NPP aro BJP dolrango napskana miksongenga ine jangbingbanganirangko knasona man•ahachim.
2023 bilsini Assembly election-na tarisamsoani bidingo sing•on, ia chango dolsan dal•batsranggipa ong•e cheasan ong•aigija bakgittamoni bakgnikode chegopna jotton ka•gen ine Chatrath parakataha.
“Assembly election-na da•o bilsigni dongkuengani gimin chinga an•tangtangko tarisamsoenga aro gipin dolrango pangchakjaenga. Darang dolan election-nade tarisamsona nanga,” ine Chatrath aganaha.
Election-na skang ku•rachakgipa bang•a kamrangkon chu•sokatna man•jaenga ineba ua MDA sorkariko matnangataha.
“Uni gimin ia chang election-ode manderang dingtanganiko nangnikenga ine chinga nikna man•engaha aro manderang dingtanganina ia changode dilgiparangko seokgen,” ine AICC-ni dilgipa parakataha.
