Shillong, Mar 7: Conrad Sangma-chi dilenggipa MDA-II sorkariko nambatgipa dol ine Mongolbar salo, UDP-ni dilgipa aro gital cabinet minister Paul Lyngdoh a•kangataha.
Lyngdoh-ni parakatani gitade, ia gital sorkario kam changgipa aro cabinet membor-rangba skia pora donggiparara ong•e nambatgipa sorkari ong•enga.
Ia MDA-II sorkariara ku•cholsan ong•gipa, kamni gimin ma•sigipa aro nambatsranggipa cabinet ong•enga ine janapatengon, ia sorkariara manderangni ra•chakna man•gipa sorkari ong•enga ine West Shillong-ni MLA parakataha.
Portfolio-rangko sualanide chief minister-ni daitosa ong•a ine janapatskaengon, minister sakantinan chief minister, nangani kri kamrangko suale on•gen ine Lyngdoh, an•tangni ka•dongchakenganiko parakataha.
Ia chang, Cabinet-o UDP-na biap damgnikosan on•aiahani gimin sing•on, saksa sakgni minister-chiba kamko chu•sokatanisa mongsonggipa ong•aia ine Lyngdoh parakataha.
UDP MLA-rangni gisepo, Cabinet-ni biapko sualna songgigrikanirang dongama ine sing•anina aganchakaniko on•angengon, da•o dipet iani bidingo maming chanchia dongkuja indiba je on•gimin cholko name jakkalanisa mongsonggipa ong•enga ine UDP Minister parakataha.
