Tura, May 25: Beton on·jani gimin kamrangko ka·gija jingjengatengani gisepon, council-o kam ka·enggiparangna jabongani betonrangko on·na gita mitam officerrangni kam ka·na re·baanichi Mongolbar salo Tura, GHADC office-o adita jikjakanirang ong·angaha.
Betonrangko on·jaenganina jingjengatenggipa dol, NGEA-ni jakrikra Pa Brithen Sangma, campus-o adita jegrikanirangko dakaha jeni a·selo police-rang re·baenba mamlako tom·tomatena nangpilaha.
Council-ni namgnina, officerrangna kamtangtangko ka·piltokna cholko on·china council-o kam ka·giparangko mol·molengon, kamtangko ka·pilna sike re·bagipa gazetted officerrangko maming golmal ka·jachina gita ua agan-mol·molaha aro council-ni obostako namatna aro council-ko gital rikpiltaina cholrangko am·na jotton ka·stapenga ine GHADC-ni CEM Pa Benedic Marak agan-talataha.
Jingjengatachi maming namgniko ra·bajawa ine aganengon, council-o matchotchipgija dongenggipa neng·nikanirangko namaona ra·bana aro kamko ka·chakatna gital Executive Committee-na cholko on·chinaba ua, da·o jingjengatenggipa dolko mol·molataha.
Unomiting, NGEA-ni jakrikja Pa Brethen Sangma-ni aganani gita, council-o kam ka·enggipa mitamrang kamona re·batokahachim, jean uamangni ku·cholsan nangrime tik ka·giminko pe·ani ong·a. Officer ong·gijagiparang jemangan kamtangko ka·na re·batokachim uamangara NGEA-ni gitcham dilgiparang ong·a ineba ua matnange aganaha.
Gitcham pay scale-ni betonko NGEA maming dakeba ra·jawa aro gital betonrangko on·china gita uamang dabiangkugen ine aganenba, officer ong·gijagipa mitam kam ka·giparang an·tangtangni man·gnina jinmaoni an·tangtangko bak dakaha ineba ua matnangataha.
Indake ong·engon, koborrangko man·sodapani gita, CEM aro uni staff-rangni garirangko ma·sina man·gija manderang ro·ong goaha. Iana, maming dos gri manderangko skatang saknaatjachina aro kam ka·enggiparangko aro kam ka·na re·bagiparangko golmal ka·pajachina gita GHADC-ni CEM Pa Benedic Marak jingjengatgiparango mol·molataha.
