Guwahati, May 12: Assam a•doko obostarang namjabatroroengahani gimin COVID-19-ko warachakna gita Budbar sal dipet niamrangkoba rakbatataha aro uandaken da•o curfew-koba attam 1:00 baji dipet ra•gatangskaenba, gari gorarangni re•ruraanikoba attam 2:00 baji dipet champengataha.
Assam a•doko niamrangko rakbatatahani gimin da•o bazar anti cha•ani aro pilak dokkanrangkon attam 1:00 bajion chipna nanggnok aro sal 15-na kingking bazar aro pilak haat-rangkoba chipe donataha.
Budbar salo, skanggipa changna Assam a•dokni Chief Minister Himanta Biswa Sarma-ni dilanichi cabinet tom•enba, Assam-o niamrangko rakbatataha.
Koborko on•ani gitade, batanggimin konta 24-ni gisepon Assam a•doko sak 84 manderang COVID man•e siangaha aro da•o Assam a•doko COVID man•e dongenggiparang sak 39,000 batengahachim.
Assam a•doko skul, college aro university-rangko sal 15-na chu•gimik chipe donangkugen aro class-rangko internet gita ra•skana man•gen.
Sorkari aro sorkari ong•gijagipa office-rangkoba sal 15-na chipe donanggen indiba nangchongmotgipa kamrangko ka•enggiparang, niam retirangko nirokenggipa aro election office-rangkode kulina man•gen.
Bia ka•ani aro mande sianirango sorkarini permission-ko ra•chengani ja•man sak 10-na bate tom•na man•jawa aro pilak olakkiram nokrangkoba sal 15-na chipe donanggen.
Manderangko salruragipa garirango 30 percent-na bate gatna man•jawa aro auto rickshaw, cycle rickshaw baksana taxi-rangoba saltimgipa baksana mande sakgnisan gadona man•aigen.
Garirang odd-even nomboro pangchake pring 5:00 bajioni attam 2:00 bajiona re•rurana man•gen indiba attam 2:00 bajioni pring 5:00 bajionade salantian manderangni re•ruraaniko chu•gimik champengatgen.
