Shillong, March 28: Gong crore 350-na batpile koros ong•ani ja•manoba a•dok sorkari, Mawmluh Cherra Cements Limited (MCCL)-ko tangatpilna man•jahani giminsa gipin company-rang baksa nangrime chalaina cholrangko nienga ine Mongolbar salo Meghalaya a•dokni Chief Minister Conrad K Sangma parakataha.
Assembly-o sing•anirangna aganchakaniko on•angengon, batanggimin bilsi bongani gisepo MCCL-ni dormaharangko aro gipin grorangko chotna gita gong crore 100 tangkarangkoba on•ahachim indiba ia cement plant-ko tangatpilna man•jahani giminsa gipin company-rang baksa nangrime chalaina cholrangko nienga ine Sangma parakataha.
Indake ong•genchimoba da•o dipet iani bidingo sorkari maming ja•kurangko de•kujaenga ineba ua talataniko on•angaha.
Chief Minister-ni parakatani gitade, MCCL-ko chalaina gita sorkari, minggitam cholrangko nienga aro uan skanggipade gipin dolrang baksa nangrime chalaiani, gnigipade MCCL-na tangka paisarangko koros ka•dapani aro bon•kamgipade MCCL-ko chipanian ong•enga.
Iana skang, MCCL-ko tangatpiltaiani bidingo Voice of the People’s Party (VPP)-ni president aro Nongkrem-ni MLA Ardent Miller Basaiawmoit, a•dok sorkariko sing•doangengon, gipin dolrang baksa nangrime MCCL-ko chalaianide ia cement plant-na kenchakna nangani ong•enga ine Jaintia Hills-o donggipa gipin cement karkanarangni kamrangkoba nisusachina gita sorkariko didiangaha.
Iana, a•dokni Commerce & Industries Minister Sniawbhalang Dhar, aganchakaniko on•angskaengon, ia MCCL-ko chalaina sikenggipa company-ni lekkarangko da•o dipet sorkari man•soa dongkuja aro lekkarangko name nichengani ja•manosa nanga gita ja•kurangko de•anggen ine talataniko on•angaha.
Iakoba poraie nina man·gen: Emangre Forest Reserve-o jabol galaniko jolni chadamberang jegala
