Tura, April 18: Mongolbar salo, Damalgre police station-ni ning•o donggipa Balalgre songni manderang, ma•sina man•gijagipa me•asa saksani manggisiko buringoniko nikani ja•man police-rangna kobor on•ataha.
Koborko on•ani gitade, ia mandeara banonibasa re•bae ia biapo neng•takengachimkon.
Police-rang, ia mandeni manggisi sambaoniko, sam bottle-gni, kombol kingsa, gamcha kingsa, sandal jorasa, rongchu aro Tura civil hospital-ni outpatient ticket kingsakoba man•aha.
Ia mandeara saenggipa mande ong•achimkon aro uni medical certificate-o seani gitade ia mandeara bilsi 35 ong•gipa Prodip Sangma ong•achim.
Ia mande, adita saanirang baksa re•anggipa April 13 tariko Tura civil hospital-ni emergency department-ona re•angahachim aro uko hospital-o dongchina aro dingtang dingtang medical test-rangkoba dakchina ku•pattiahachim. Indiba uni medical report-o parakani gitade, uko nirokgipa mande dongja inenba ua hospital-o dongna jechakahachim.
Da•o dipet ia mandeni siani a•selko tale ma•sikujaengoba uni manggisi ta•raken soangengaha ine nike, uni siani a•selko ma•sie ra•na gita post mortem ka•na watataha.
