Shillong, Sept 23: A·dok damsaoni damgipinona re·gnigipa garirangko watrurana gita Mawiong-o gital rikatgipa Inter-State Bus Terminus (ISBT)-ko ia bilsi December jani gisepon jakkalchakatna man·gnini gimin seokgital a·dokni transport minister Pa Dasakhiatbha Lamare an·tangni ka·dongsoaniko parakangaha.
Mawiong-o rikatgipa ISBT-ko re·anggipa July jao ma·mongni Home Minister Pa Amit Shah-ni a·dokona wenbamiting somoio oprake on·anggenchimoba dingtang dingtang biaprangchina re·ruragipa garirangko watnade ua biapko jakkalkujaengachim.
Indake ong·engon, minister-ni aganani gita, PWD (Roads) ia project-ko department-na pakwatmanaha indiba matchotkugijagipa mitam lekkani kamrang dongkuenga aro iarang jensomoio matchotahaon canteen-rang, dokanrang aro songregiparangna neng·takani biaprangko chalaina gita tender-ko on·anggen, ine Pa Lamare agan-talataha.
Bus garirangko ISBT-oni watruraaniko jako ra·ani gimin sing·on, ISBT-ko chalaina gita sorkari jeba private firm-na pakwatna miksonga dongja aro iako sorkarian chu·gimik jako ra·e chalaigen ine talatangaha.
Ia project-ni kamrang matchota ba matchokugijani gimin sing·on, ISBT-ko rikatani chu·gimik kamrang 98 percent-ni gitan matchotaha ine parakangengon, karen sringani kamrang mitam aro canteen-rangni babilsio bang·gija kamrangko matchotgija dongengkua, ia chonchona kamrangko re·baenggipa antignini gisepon matchotatgen,” ine aganenba, project-ko maidakgipa cholchi gong·rake a·bachengatna man·gen iani gimin department baksa agangrikgen aro kamrangko nirokna gita ua an·tangan biapona re·ange nieaniko dakanggen ineba minister agandapataha.
