Shillong, Aug 30: Meghalaya a•doko donggipa autonomous district council-ni kacharirangna on•gimin bilrangko bilgriatjachina gita Mongolbar salo, Garo Hills Autonomous District Council (GHADC)-ni Deputy Chief Executive Membor Nikman Ch Marak didiangaha.
Autonomous District Council (ADC)-rango CPC aro CRPC-ko ra•gatani bidingo chanchirimna gita Mongolbar salo, a•dokni damgittam autonomous district council-rang baksa a•dokni Chief Minister Conrad K Sangma-ni dilanichi tom•aniko ong•atanio GHADC-ni Deputy CEM, ia kattarangko aganaha.
“A•dokni district council-rangna on•gimin bilrangko bilgriatjachina chinga nangnikenga. District council-rangko a•bachengatani somoio je bilrangkon ADC-rangna on•ahachim, ia bilrang mikkangchiba apsan daken ong•angkuchina,” ine Marak aganaha.
Ia tom•anio Khasi Hills Autonomous District Council (KHADC)-ni Chief Executive Membor (CEM) Titosstarwell Chyne-ba dongpae chanchirimanio bak ra•angengon, niamni gimin u•i-ma•sigipa manderang baksa aro seokako man•gipa MDC-rang baksa asonge chanchirimna ine salgni somoiko bi•angskaaha.
