Shillong, Dec 05: Meghalaya a·doko do·o salruragipa garirangoniko badiaba dolni manderang niam gri kajina gile ra·enga ine matnangatenba, Confederation of Ri Bhoi People (CORP)-ni membor-rang, Ri Bhoi a·jani District Administration-na badi ka·doangaha.
Iani bidingo CORP-ni president Bandar Rynthathiang, gipin dilgiparang baksa Ri Bhoi a·jani additional deputy commissioner MB Tongper-ko grongenba, niam gri kajina gilenggipa manderangni kosako rakgipa ja·kurangko de·china didiangaha.
Meghalaya a·dokni dingtang dingtang biaprango do·o badingenggipa aro do·o salruraenggipa manderangoniko niam gri kajina gile ra·engani gimin CORP baksana Ri Bhoi a·jani Poultry Traders & Suppliers dolba raken jegalataha aro iandake niam gri kajina gile ra·enggipa manderangni kosako rakbatsranggipa ja·kurangko de·china sorkariko didiataha.
