Shillong, July 1: Ong·na kragijagipa a·selo Nagaland a·dokoni A·chik jat sakgnini Haryana-o sianganiko sandirokatani bidingo jakdangdikataniko nangnike a·dokni warachakgipa dolni dilgipa Dr Mukul Sangma, Ma·mongni Home Minister Pa Amit Shah-na Butbar salo lekka sedoataha.
“Gisiko nangatgipa mamla ong·ani gimino, ua a·sel-obostani gimin tale ra·china aro niamo pangchake jakdangdikatachi sianggipa ma·desana kraa bichalko ka·e on·china gita mol·mola,” ine Pa Sangma uni seatgipa chittio janapataha.
Pa Sangma-ni aganani gita, gisik dongsiksakatgipa koborko media-ni giproroatgipao ua obosta ong·ani ja·pangrang namen ning·tugipa ong·aha.
“Ian mija June 24 tariko Haryana, Gurugram, Basai, Alpha Hospital-o saako sangipa doctor aro nurse-ni simsakgijani a·sel ma·detang Rose Sangma sagi siangna gita nangaha ine matnange ua hospital-ni authority ba hospitalko nirokatenggipani kosako sianggipa Te Samuel Sangma-ni mokordoma ka·anggipa aro salgipino New Delhi-ni Safdarjung-o mija June 25 tariko ong·na kragijagipa a·selo Te Samuel Sangma-ni siani bidingo ong·a,” ineba Pa Sangma janapataha.
A·sel ong·ani ja·pango nangchape ian dingtang dingtang ong·aniona sokanganiko ma·sirikna gita man·a aro a·songni meli-nangrimani, ku·cholsan ong·ani aro tom·tomanirango namen jajrenganirangko ong·ataha ineba Pa Sangma janapatjolaha.
Apsandake, Tura-ni MP aro Union minister gitcham Ma Agatha K. Sangma-ba a·songni mongsonggipa biapo Dimapur-oni A·chik jat sakgnini ong·na kragipa obostao sianganiko namedake sandirokatchina gita mol·mole Home Minister, Pa Amit Shah-na lekka sedoataha.
Butbar salo Pa Amit Shah-na seatgipa chittio, Ma Agatha-ni janapatani gita, sianggipa Te Samuel Sangma, hospital-o saako sangipa doctor aro nurse-ni simsakgijanichi uni ma·detang Rose Sangma siaona sokaha ine hospital-ni kosako badi ka·doangaha. Uni ja·man salsagipao Te Samuel-ni uni dongenggipa kutturio kae siako man·anian ong·gija jak donganiko potchipaona sokataha.
Koboroniko niksoe a·bachenge u·irikna man·ani gita ian sakgipin mandeni jakchi so·otako man·ani gitasa nikna man·enga jenan uamang ma·desani siaona sokani chong·motko u·ina gita chubatsranggipa ge·etanio pangchake namedake sandirokataniko nangenga, ine Ma Agatha janapataha.
Indake, ua mamlako seng·gnange sandirokatchina aro dos dakgiparangni kosako a·songni niamo pangchake raka sastirangko on·e duko ga·akenggipa sianggipa Rose Sangma aro Samuel Sangma-maangni nokdangna kragipa bichalko ka·e on·china gita ua, Home Minister-ko mol·molataha.
