Tura, July 10: A•chik a•songoni sakgni manderangko drug ba pekgipa bosturangko badingsrikanina robibar pringo rim•aha. West Garo Hills Police stationoni Turani Anti-task force special operationko ka•mitingo bolsa Maruti Alto garioniko(ML08 G 6541) heroin gram 8.19, tangka gong 14,230/- aro ge•gni mobile phonerangko Turao rim•aha. Rim•ako man•gipa manderangara Gongadamaloni Cherak R Marak aro Williamnagar Balsri a•dingoni Tengsuang S Sangma ong•achim.
Dos dakgiparangko sing•sandimitingo uamangni aganchakani gitade uamangko East Khasi Hillsni Laitkor Rngi, Sohiongoni mande saksa Bryan Nongmor minggipasa uamangona ia bosturangko watataha.
East Khasi Hills policeoni u•iatani gitade uamangba heroin gram 4.42 mobile phone ge•sa aro gipin bosturangko man•aha.
