Tura, Dec 23: Bobil dake chakatgipa dolrangni dongnue donanggipa adita gulirangko Budbar pringo, East Garo Hills a·jani police-rang, Chipit Mongre minggipa a·brioniko man·aha. Ia gulirangko Garo National Liberation Army (GNLA) bobil dolni manderang dongnue donangahachimkon ine police-rang chanchichipenga.
East Garo Hills a·jani SP Bruno A Sangma-ni u·iatani gitade, Chipit Mongre minggipa a·brio silchidarerangko dongnue donenga ine koborko man·soani ja·mano Deputy SP Victor N Sangma-ni dilanichi dolsa police-rang, ia biapona re·ange Mongolbar salonin dongnue donanggipa silchidarerangko sandina a·bachengaha aro uandaken Budbar pringni 7:30 bajimango ia biaponiko gulirangko man·aha.
Ia biaponiko police-rang rong 47 .30-06 mm gulirangko man·aha ineba East Garo Hills a·jani SP parakataha.
SP-ni u·iatani gitade, gulirangko man·ani ja·mano police-rang, Williamnagar police station-ona ra·bae iani bidingo ning·tue sandiangkuna gita dingtangmancha case-koba segataha.
GNLA bobil dolni dongnue donanggipa silchidarerangko police-rang sandiengkua ineba SP u·iataha.
