Shillong, June 16: East Jaintia Hills a·jani koela a·damo gimaenggipa manderangoni saksani manggisiko Budbar salpaksachibara, Indian Navy, NDRF aro Meghalaya State Fire & Emergency Service-ni sipairang, rang·ongkatna man·aha.
Ia manggisiko koela a·kolni ka·mabatgipao bangkange dongako Indian Navy-ni chining ripgipa sipairang nike Budbar salo ra·ongkatna man·aha aro ja·mano East Jaintia Hills a·jani DC, ADC aro gipin official-rangni mikkango, Saipung police station-ni officer-in-charge-na pakwate on·ataha.
Mongolbar salon Indian Navy-ni diver-rang, ia koela a·kolo napenba, gimaenggipa manderangoni sakgnini manggisikode nikahachim indiba da·o dipet sipairang, saksani manggisikosan ra·ongkatna man·engkua ine official-rang u·iataha.
Re·anggipa May jani 30 tariko East Jaintia Hills a·jani Sutnga Elaka-ni koela a·kolo dynamite boma gopretani ja·man rang·san ia koela a·kolo chi napenba, ia koela a·kolo koela bikotenggipa manderang gimaahachim.
Indake ong·engon, koela a·kolo gimakuenggipa gipin manderangkoba Navy, NDRF aro gipin dolrang sandiengkua aro Mongolbar salo nikgipa mande sakgipinni manggisikoba Bristibar salo ra·ongkatna man·naba gnang ine ia biapo kamrangko nirokenggipa official-rang parakataha.
