Shillong, July 20: Adita salrangna skang, East Jaintia Hills a·jani Khliehriat-o donggipa police reserve-o IED bomako gopretahani gimin police-rang, Hynniewtrep National Liberation Council (HNLC) bobil dolna kam ka·e on·enggipa mande sakbriko rim·aha.
Iako Mongolbar salo, Assistant Inspector General of Police (A) Gabriel K Iangrai u·iataha.
Matnangako man·gipa manderangni ku·rachakani gitade, uamang gari bolsako ra·e police reserve-ona re·angenba IED bomako donbaaha ine Iangrai parakataha.
July-ni 13 walo aro July-ni 14 tarik pringwalo, ia manderang police reserve-o bomako gopretaha aro boma gopretanio police building nosto ka·ako man·aha aro sipairangoni saksa saknaaniko man·aha ineba Iangrai parakataha.
Indake ong·engon, ia a·selni bidingo am·sandianiko dakanichi, 2019 bilsio HNLC bobil dolni nisanko badale donanio jak donggipa aro Khliehriat-ni Coke karkanao IED bomako gopretanio jak donggipa HNLC bobil dolni mande sakgnikoba rim·na man·jolaha ine police official parakataha.
“Ia a·selni bidingo am·sandianirangko dakengkua aro dos donggipa gipin manderangkoba police-rang rim·na sandiengkua,” ineba Iangrai parakataha.
