Shillong, July 20: Meghalaya Teacher Eligibility Test (MTET)ko matchote dakgiminni gamchatani da·ode janggi tanga gimiknan ong·gnok ine Meghalaya-ni Education Minister Pa Lahkmen Rymbui, Mongolbar salo u·iataha.
Iana skangde MTET porikkako matchote dakgiminrangna batgipa bilsi-gnirangsan gamchatani cholko on·aiachim, indiba da·ode MTET qualification janggi tanga gimiknan ong·gnok ine mijao National Council of Teacher Education (NCTE)oni u·iatangaha.
Iani bidingo Pa Rymbui-ni u·iatani gita, jemangan MTET porikkako matchote dakahachim uamang setaina nangjana gita ia antini gisepon Meghalaya sorkari iani gimin u·iatanggen.
Setaiatnasigipa MTET porikkani bidingo janapatengon, porikkako seatna manchigiminkoba parakatmanahachim indiba sajinmani a·sel dontongatna nangaiaha ine talatan baksana, “porikkarangko ong·atna gita tarikrangko tik ka·e re·baenggipa antio ba sal-chikkingni gisepon gital u·iatanikoba on·angtaigen ine education minister agandapataha.
MTET porikkako matchotgimin candidate-rang jemangan personal interview-o chu·sokkujachim uamangde jensomoio biap bangbang ong·anirang dongon gital dake dorkasto on·taina gita nanggen ineba ua u·iataha.
Indake ong·engon, Shillong-ni Malki kal·chakramo jingjengatenggipa All Meghalaya Government LP School Contractual Teachers’ Association-ni dabienggipani gimin sing·on, iani gimin man·adipet uamang cholko sandie niaha indiba dongimin niamrang gita jemangkon jedakgipa gadangona seokahachim uamangkoba obostao pangchake kamo rakkina gita seokpiltaianiko dakna nangaigen ine Pa Rymbui aganchakaha.
Gimik-gimang skigipa sak 1,100 mangoni sak 200 mangmangsan eligibility test-o chu·soktokaiahani gimin, All Meghalaya Government LP School Contractual Teachers’ Association uamangna gnigipa chang cholko on·piltaichina gita dabiangtokahachim.
Meghalaya Teacher Eligibility Test-ara Shillong-ni Directorate of Education Research & Training-chi a·dokni gadango ong·atronggipa porikka ong·a. Ian Meghalaya-ni sorkari skulrango class 1 oni class 8-ona kragipa skigiparangko basee seokna gita dingtangmancha ong·atgipa porikkaba ong·a.sa
