Shillong, September 7: FOCUS Scheme-ara ma·mong sorkarini tangka paisa-sa ine Warachakgipa Trinamool Congress dol matnange agananina, September 7 tariko a·dokni skotong Minister Conrad K Sangma, ian a·doko game ge·e cha·giparangni janggitangani gadangko tang·doatna aro uamangna pangkama janggitangani cholko on·a miksonge a·dok sorkarioni tangka paisarangchi chalaienggipasa ine aganchakskaaha.
Ian MDA sorkarini a·doko game ge·e cha·enggipa dolrangna dingtangmancha nisan done dakchakaniko on·enggipa Scheme-rangoni mongsonggipa ong·enga aro iarangko bimang pil·atna a·dokni kona ki·tikon Self Help Group (SHG)-rangko bosaiate aro uamangna tangka paisao dakchakaniko on·e a·doko songdonggipa sakantini silroro namroroanina ja·ku ga·ani ong·enga ineba Skotong Minister Conrad Sangma agandapaha.
