Shillong, March 28: Meghalaya a•doko songdongenggipa manderangni jegalenggipa Meghalaya Regulation of Gaming Act 2021-ko ra•galpilna gita Mongolbar salo, Meghalaya Regulation of Gaming (Repeal) Bill 2023-ko Meghalaya Legislative Assembly-o pass ka•angaha.
Ia Meghalaya Regulation of Gaming Act 2021-ko 2021 bilsini March 26 tariko dingtangmancha u•iatanichi Meghalaya Legislative Assembly pass ka•ahachim indiba dingtang dingtang dolrang baksana a•doko songdongenggipa manderangni jegalanirangko man•ahani gimin ia Act ba niamko ra•galpilna gita a•dok sorkari, dingtangmancha Bill-ko ra•bae Assembly-ni Budget Session-ko pass ka•angaha.
Ia Meghalaya Regulation of Gaming Act 2021-ko a•doko songdongenggipa manderang jegaltokahani gimin a•doko casino ba joa kal•chakgipa biaprangko chalaina licence on•ani niamko taridapchina gita VPP-ni MLA Ardent M Basaiawmoit didiangahachim.
Indake ong•genchimoba, provisional licence-rangna dongimin somoi bon•aha aro licence man•gipa mandeba bank guarantee-ko ra•pilaha ine a•dokni Taxation Minister Abu Taher Mondal, talataniko on•angahaon VPP-ni MLA, Minister-ni aganchakaniko chu•ongnike, niam taridapchina agananiko ra•pilaha.
