Shillong, March 28: Congress dolni dilgipa aro Parliament-ni membor Te Rahul Gandhi-ko ra·galani bidingo, Congress Legislators Party (CLP)ni dilgipa aro agantimgipa Pa Ronnie V Lyngdoh, Mawhati-ni MLA Pa Charles Marngar, Umroi-ni MLA Dr Celestine Lyngdoh aro Gambegre-ni MLA Pa Saleng Sangma-maangni dilanichi Meghalaya Pradesh Congress Committee (MPCC)-ba Mongolbar salo, Shillong-ni Congress Bhavan-o jegale jingjengatangaha.
CLP-ni dilgipa Pa Ronnie Lyngdoh, jingjengatao bakko ra·enba koborna aganangengon, Congress dolni dilgipa Te Rahul Gandhi-ko ra·galanina jegalangenba, ian Pa Narendra Modi-ni rikdilenggipa NDA sorkarini, democratic-ni bilrangko aro democratic-ni gita ku·rangko on·na ba aganna jakgitel ong·ani bilrangko champengani ba ra·sekdraani ong·chongmota ine matnange aganangan baksa, NDA sorkarini sason ka·sretanirang aro kamrang tik ong·gijani kosako chingni dilgipa Te Rahul Gandhi-ni parliament-o aro dingtang dingtang biaprango kakket ku·rangko on·enganirangko uamang champengna jotton ka·enga ineba Pa Lyngdoh aganangkuaha.
Indake ong·engon, Te Rahul Gandhi-ko Lok Sabha-ni membor ong·aoniko ra·galani gimin uamangni dilgipa baksa ong·aniko mesokna, Congress dolni dilgiparang a·songni dingtang dingtang biaprango jegalanirangko dakenga ine nikatna gita man·gen.
Indake nikatna man·gen, chong·motan, batanggimin 2019 bilsio Te Rahul Gandhi, Karnataka-o eleksinna campaign ka·mitingo Modi-ni bimingchi minggiparang gimikan ra·seke ra·giparara ine manderangna aganprakahachim, jenan Wayanand-ni MP-ko re·anggipa anti Bristibar salo Surat-ni kacharichi dosi on·angani ja·man, parliament-ni membor ong·aoniko ra·galaha.
Iakoba poraie nina man·gen: Cr 350 koros ka•ani ja•manba MCCL-ko sorkari tangatpilna man•ja: CM
